مكتوب على باب بلدنا

مكتوب على باب بلدنا

مكتوب على باب بلدنا :

يا داخل بلدنا .. ومنك كتير ..

بلاد الصغير . بلاد الكبير ..

وفيها اللي يهبر .. وفيها الوزير ..

وفيها تأبج .. وسرك فى بير ..


ده فارش شوارع .. ده نايم سرير ..

مدردح .. مفتح . واعمى ضرير ..

وفيها الموظف .. وفيها المدير ..

وحاضنة محمد . وجورج و سمير ..


وفيها التكاسي .. مراكب مراسي ..

وزى ما أنت راسي ..

هيافة .. وتفاهة .. ووقفة نواصي ..

لبانة .. ومعاكسة .. وشيشة و صفير ..


وفيها كآبة .. وفيها ديابة ..

ماتعرفش مولد ده ولا غابة ..

شطارة وخيابة .. وسجن و نيابة ..

وفيها المدمس .. وفيها الفطير ..


وفيها العميل .. وفيها النخيل ..

وفيها ترعنا . وبواخر و نيل ..

ومطرب يدندن يا عينى يا ليل ..

ده قاعد يدندن .. ده نازل شخير..


وفيها المحمر .. وفيها المشمر ..

وإيد فيها ناعمة .. وإيدك تشمر ..

وناس فيها ماشية قفاها يقمر..

وفازة وجردل . وقلة و زير ..


بلاد الأوبيج .. بلاد الجنيه ..

تعالى يا باشا .. وقرب يا بيه ..

وإمتى .. ولماذا .. وهذا .. وليه ..

وفيها اللي جاهل .. وعامل خبير ..


بلاد السياحة .. بلاد النواحه ..

وفيها بجاحه . وفيها قباحه ..

وخن . وغرزه .. ومسجد وساحه ..

وقبله .. ومنبر .. ومدنه .. وحصير ..


بلاد اللي ظالم .. بلاد المظالم ..

هتكسب برافو . وشاطر .. عفارم ..

تماين .. تدادي .. تهادي .. تسالم ..

وفيها اللي يشكي رقبته تطير ..


وفيها الملبس .. وفيها المدمس ..

بتاكل .. وتقطم .. تحف .. و تغمس ..

ومره تحشش .. ومره تخمس ..

وعالم تنفس .. دخانها يطير ..


وفيها المياتم .. وفيها ام هاشم ..

وفيها المزور .. وفيها اللي خاتم ..

وفيها المخزوق .. وفيها اللي حاكم ..

وفيها اللي واطي .. وعامل أمير ..


بلادنا الجميله .. جناين .. نجيله ..

عمايل بتفرح . وخيبه تقيله ..

وعالم تبلطج . وناس مالها حيله ..

ممثل حكومه .. ممثل قدير ..


بلادنا العجيبه .. طباعها غريبه ..

بلادنا اللي جاهله .. بلادنا الأديبه ..

بلادنا اللي طيبه .. بلادنا المريبه ..

بلادنا اللى عايقه ومالها نظير ..


بلدنا .. وطنا . وموطن حمير ..

ومقلب زباله . وورد و عبير ..

تاريخنا حضاره .. وحاضر حقير ..

ده مش ضعف مني . ولكن لأني ..

عايش في بلدي . مجرد أجير .....

ـــــــــــــــــــ

طارق المملوك

2004-11-30

قصيدة .. ضى العيون

ضى العيون

الرمش طيف ..طالل من الليل الجميل ..

زى النخيل . اسمر كحيل ..

و عيون تلالى من ورا طرح البشاير والنجوم ..

زى القمر .

صافيه العيون بحرين عسل ..

يادى الجمال ..لما نده سحر العيون .. قرب وبان

ع اللى حصل

قلبى الضعيف .. زار الربيع ..

اخضر يدقدق ع الببان . بعد الخريف ..

يلقى درعاته مفتحه .. ملياه حنين ..

اجرى عليه

تهرب هموم .. من سحر عين .

وتسيب قلوبنا مروحه

اه منها يانا و سحرها

سحرت قلوب .. ميًات .. الوف ..

تحلم تفتح ع الجناين . و الورود ..

يطرح بشاير حسنها بين النخيل ..

تبقى سكنها .. و ضلها

دى عيون شقاى .. تنده عليك من غير كلام ..

اصل الحروف .. ساكنه ضياها و حسنها ..

من غير لا زيف

ولا فيش رتوش .. تقدر تحوش ..

سحر العيون .. لما سهامها تأسرك ..

تسكن وشوش .. كل البشر

تصبح اسيرة لحبها ..

وف ليل طويل .. يحلى السهر .. مع ضيها .

وقلوب كتير .. هايمة تدور..

بين النجوم

تحلم تطول يوم حسنها

منها اللى دايب ف الضيا زى الفراش ..

منها الحزين .. باكى انين . صابه ارتعاش ..

من سحرها

نام الجميل .. غاب القمر بين الغيوم .

بحرى الغريق .. سكنه الحريق ..

لما ندانى حسنها .فجاه ف يوم ..

ولا بل ريق

قلبى البرئ .. ميل عليا وشوشه ..

فكر . وقال

ابعد بعيد .. دى عيون محال ..

قالت : " كلام مين اللى قال ..

انت المنى .. انت الهنا .

ده القلب رايدك و اكتوى .

بالحب مال

ده انا من زمان .. نفسي الاوان ..

ييجى قوام .. ترجع تكون . انت الحبيب ..

تسكن غصون .. نينى العيون ..

و الزقزقه .. احلى كلام .

يوصلنى منك ف الغياب . وانت بعيد ..

ويا النسيم .. ويا الطيور . يحيي الورود ..

بين القصايد .. و المعانى . و الزجل ..

يحلى الغزل .. توفى الوعود ..

مستنياك .. وكلى لهفة و اشتياق ..

بس انت عود "

*****

طارق المملوك

17/9/2006