وهانعمل ايه ؟؟ !!

وهانعمل ايه ؟؟ !!
****
و هانعمل ايه ؟؟!!
طول ماحنا سايبين فى البيوت خفافيش ..
بتنهش لحمنا البالى..
طول ماحنا راضيين بالنواح.. ونقول ياعمنا..
طب وانا مالى ..
لو جه ماجاش .. مايهمنيش ..
كون انصلح .. او كان بلاش ..
تفرق ف ايه ؟
مبسوط كده .. وعايش انا ف حالى..

وهانعمل ايه؟ ..
انا بيهمنى .. ايه هايجرالى ..
عايش كده .. واهه هو ده حالى ..
بسعى ورا لقمه ..
اجيبها م النجمه ..
بسعى ورا هدمه .. تستراذى عيالى..
قال الخبيث حكمه ..
"هايجينا بكرة بايه؟..
جاى بدموع ف عنيه..
خايف .. جبان و ضعيف ..
شايل كفنه بايديه ..
وشمسه طاقة موت ..
وبعد بكره يفوت ..
وكل يوم بنموت ..
نغرق ف كون عتمة ..
تفرق ف ايه يا ناس .. اهى و السلام خاتمه "..
اعقل كلام الخوف ..
واعرف و بوص و شوف..
نخرص .. يموت الصوت ..
وكل يوم هانموت ..
وموت يجينا بموت ..
اعمل لبكره يكون..
اخلق له طاقة نور ..
اصرخ .. و جاهد .. كون ..
إملى البراح و الكون ..
تحضن ايدك ايديه ..

و هانعمل ايه؟ ..
دى الرجل مش شايلة ..
والعافيه راحت فين .. ف السجن مش طايلة ..
حابسه دموع العين .. جوا السواد و الليل ..
حلم الغلابة بعيد .. اصل النجوم عالية
والصوت طريد القهر .. و الكلمه مش قايلة ..
سجانا مش انسان .. ميت ف عينه الضى ..
وهايعمل ايه وازاى؟ .. ده زمانه بكره جاى ..
ده حاشية عايزة الحرق .. مالهم ف بكره زى ..
ده بكرة جايب سيف ..
للدنيا نازل ضيف ..
ييجى المسيح الحى ..
والكمة وسط الفضا ..
تزعق بميت رنه ..
حلم الرضيع مشروع .. وكلامه يتغنى ..
تحلم بيوم هاتكون .. والخلق تستنى ..
اخلق لحلمك كون .. الارض مش جنة ..

وهانعمل ايه؟
وايدين تروح ع الخد ..
اخر زمان يا خلق ..
الاخ يسرق اخوه ..
ماحد ينفع حد ..
والابن يتقل ابوه ..
ومافيش عقاب و لا حد ..
يا خلق فوقوا يا هو ..
ولاييجى يوم الرد ..
الظلم بينا جابوه ..
و السيرك يوم نصبوه ..
بلياتشو بيلعبوه ..
القرد راكب فيل ..
وغراب وصوته جميل ..
وحيه ترقص رقص ..
ادى اللى كان ناقص ..
ونقص يولد نقص ..
دور البطوله باعوه ..
مقلب وجربتوه ..
واللعبه قلبت جد ..
سيبوا الايدين ع الخد ..
يا تفوقوا بقى وكفاية ..
قمرنا شاخ و اسوًد ..

وهانعمل ايه يا خلق؟ ..
الضعف هو العيب ..
نخرس يزيد الظلم ..
نصر الغلابة قريب..
نروى غيطانه بدم ..
وبكره ياما يجيب ..
ياخد معاه الهم ..
تضم ايدنا ايديه..
تحضن عيونا عنيه ..
لما هاننسى ف يوم..
كلمة هانعمل ايه؟
****
طارق المملوك
11-5-2010

قصيدة / كلنا خالد سعيد - طارق المملوك

كلنا خالد سعيد
***
كنت ف سكاتى كل يوم اصرخ واقول ..
يا مطحونين .. يا مرتاحين .. فين القصاص ..
امتى و متى؟؟ .. اصبح مباح دم الشهيد ..
اصبح مباح دم الفتى ؟؟
ومافيش جواب ..
ومافيش شريف .. ينصب ميزان عدل و حساب ..
سكت الكلام من جبننا .. وخلقنا خوفنا بنفسنا ..
لكن اكيد ..
راح ييجى يوم ناخد بتار .. دم الشهيد ..

الاسم منقوش ع الشطوط و الجو بارد ..
الاسم خالد .. كان حزين .. اصبح سعيد ..
مش اسمه لكن بوصفه .. خالد سعيد ..
الاسم بارز ف التاريخ .. محفور و خالد ..
الاسم خالد يا بلد .. و الدنيا عيد ..
النوه قامت فى الميدان ..
والبحر هادر .. كان جبان ..
موجه بيلعب ع الشطوط ..لعب العيال ..
وده كان زمان ..
اتولد جوانا صوت ..
و دفنا وياك صمتنا ..و الجبن موت ..
وكاننا .. ف يوم الميدان .. كان يوم ميلادنا من جديد ..
و الاسم كان خالد سعيد

افرح ونام .. ورد الجناين فتحوا .. جوا الميدان ..
غزلت ايدين رب الانام .. بكره الجميل ..
و بحكمته حرك ملكوت المحبة و السلام ..
جوا الميدان ..
افرح و نام ..
الله سلام .. قبرك سلام ..
بلدك سلام ..
وبنوهبك يا فخرنا .. احلى الكلام
اصبح مافيش .. جلاد و سيد ..
والنجم كان .. خالد سعيد ..

الصورة حلوة و مبهرة .. والكل شاف ..
ومافيش لا صوت و لا شوشرة .. الا الهتاف ..
يسقط نظام خاين خسيس ..
يسقط عميل .. يسقط رئيس .. عاش سمسرة ..
تسقط حكومات العميل .. المسخرة ..
متأجرة .. و مأجرة .. واكيد كمان متزورة ..
بدا الهتاف .. و الارض حضتنا بدفا ..
جلادنا مات .. فى الضلمه خاف .. قام انكفى
لما النسيم كان ليل و بارد .. اختفى ..
و السر كان ..
ان الجميع كان تاره واحد..
ان الجميع ف الظلم واحد ..
الكل كان اخ و صديق ..والدم واحد .
ان الجميع كان شعب خالد ..
الكل كان ام و قريب ..والكل والد ..
والروح وقود .. خلقت طوفان .. و الثورة مارد ..
ضمت شهيدنا فى حضننا و كاننا ف نفس المكان ..
كلنا خالد سعيد ..و الكل خالد ..
****
طارق المملوك
2/3/2011

هزى النخيل - طارق المملوك

هزى النخيل
****
يا بلدنا يا بلد ..
افتحى عيون القناطر و السدود ..
و ارقص يا نيل .. جنب الولاد .. ويا الورود ..
راح يتولد .. نور الصباح.. من قلب موت ..
واحنا الشهود ..
مصر العفية خلفت .. اجدع عيال ..
واللى يخلف لم يموت ...
*****
هزى نخيلك يا بلد .. و اتغسلى من حُرْ نيلك ..
يا بلدنا ازعقى ..
وبعزم ما فيكى و اصرخى ..
صرخة مخاض .. راح يتولد مليون مسيح ..
راح يتولد مليون ولد .. فلاح فصيح ..
شعبى اللى كان مجروح .. كسيح.. نال المراد ..
اه يا بلدنا يا بلد .. جايلك ولد ..
*****
هزى سعف النخيل فوق الجذوع .. يطرح نوا ..
سجيل على خاين .. خسيس ..
ايدى ف ايديك يا ابن البلد نبى سوا..
هزى السعف .. يطرح رطب ..
قلبه الحنين يحضنك .. يحضن عيالك ينطلق ..
تطرح عناقيد الغضب ..
زغلول بلح ..
صوتى اتنبح بس الكلام لساه كتير ..
غرد يا طير فوق الميدان .. اعلى و طير
فوق الولاد ضلل عليهم وجنحاتك مفردوين ..
اه يا بلدنا يا بلد .. جايلك ولد
*****

طارق المملوك
27/2/2011

الميدان - عبد الرحمن الابنودى

الميدان - عبد الرحمن الابنودى
****

أيادى مصرية سمرا.. ليها فى التمييز

ممدودة وسط الزئير.. تكسّر البراويز

سُطوع لصوت الجموع.. شوف مصر تحت الشمس

آن الأوان ترحلى.. يا دولة العواجيز!

■ ■ ■

عواجيز شداد.. مسعورين.. أكلوا بلادنا أكل

ويشبهوا بعضهم.. نهم.. وخِسّة وشكل

طلع الشباب البديع.. قلبوا خريفها ربيع

وحققوا المعجزة.. صحُّوا القتيل من القتل

■ ■ ■

إقتلنى.. قتلى.. ما حيعيد دولتك تانى

باكتب بدمى حياة تانية.. لأوطانى

دمى ده والاّ الربيع.؟ لاتَْنين بلون أخضر

وبابتسم.. من سعادتى والّا أحزانى؟

■ ■ ■

حاولتوا ما حاولتوا.. ما تشوفوا وطن غيره

سلبتوا دم الوطن.. وبْشمْتوا من خيره

أحلامنا.. بُكرانا.. أصغر ضحكة على شفه

شفتوشى صياد يا خلق.. بيقتله طيرُه؟

السوس بينخُر وسارح.. تحت إشرافَك

فرحان بهم كنت.. وشايلهم على كتافك

وأما أهالينا: من زرعوا وبنوا وصنعوا..

كانوا مداس ليك.. ولولادك.. وأحلافك.

■ ■ ■

يا مصر.. قام العليل.. رجعت له أنفاسُه

وباس جبين الوطن.. مال الوطن باسُه

من قبل موته بيوم.. صحُّوه أولاده

من كان سبب علته.. محبته لناسه!

■ ■ ■

الثورة فيضان قديم محبوس ماشافوش زُول

الثورة لوْ جدَّ.. ماتبانشى ف كلام أو قول

تعدل وتقلب فى سرِّيه، تفور فى القلب

وتتغزل فتله فتله.. فى ضمير النول.

ماتخافش على مصر يابا.. مصر محروسة

حتى من الطُّغمة دى اللى فينا.. مدسوسة

ولو انت ابوها بْصحيح.. خايف عليها قوى

تركتها ليه بدن.. بتنخره السوسة؟

■ ■ ■

وبيسرقوك يا الوطن.. قدامنا.. عينى عينك

ينده بقوّه الوطن، ويقوللى: «قوم فينك»؟

ضحكت علينا الكتب، بِعْدت بِنا عنك

لولا ولادنا اللى قاموا يسددوا دينك.

لكن خلاص يا وطن.. صحيت جموع الخلق

قبضوا على الشمس بإيديهم وقالوا: لأ

م المستحيل يفرطوا عُقد الوطن تانى

والكدب تانى.. محال.. يلبس قناع الحق!

■ ■ ■

بكل حُب الحياة.. خوَّض فى دم أخوك

قول: «إنت مين؟» للى باعوا حلمنا وباعوك

أهانوك، وذلوك، ولعبوا قمار بأحلامك

نيران هتافك.. تحرر صاحْبك الممسوك.

■ ■ ■

يرجع لها صوتها.. مصر، تعود ملامحها

تاخد مكانها القديم، والكون يصالحها

عشرات سنين تسكنوا بالكدب فى عروقنا

والدنيا متقدمه.. ومصر مطرحها!!

■ ■ ■

كتبتوا أول سطور فى صفحة الثورة

وهُمَّ.. عُلَما وخُبرا مداورة ومناورة

وقّعتوا فرعون هرب من قلب تمثاله

لكن «جيوشه» مازالوا يحلموا ببكره.

■ ■ ■

صباح حقيقى ودرْس جديد قوى فى الرفض

أتارى للشمس صوت واتارى للأرض نبض

تانى معاكم.. رجعنا نحب كلمة مصر

تانى معاكم.. رجعنا نحب ضحكة بعض!!

■ ■ ■

من كان يقول ابننا.. يطلع بنا م النَّفق!!

دى صرخة والا غنا.. وده دم والاّ شفق؟

أتاريها حاجة بسيطة الثورة يا اخواننا

مين اللى شافها كده؟ مين أول اللى بدأ؟

مش دول شبابنا اللى قالوا كرهوا أوطانهم؟

لبسنا توب الحداد.. وبْعدنا قوى عنهم..؟

همّ اللى قاموا النهارده يشعلوا الثورة

ويصنّفِوا الخلق: مين عانْهم، ومين خانْهم!!

■ ■ ■

يادى الميدان اللى حضن الفكره.. وصَهرْها

يادى الميدان اللى فتن الخلق وسحرها

يادى الميدان اللى غاب اسمه كتير عنه

وصَبَرْها ما بين عباد عاشقة وعباد كارهه.

■ ■ ■

شباب.. كإن الميدان.. أهله وعناوينه

ولا فى الميدان «نيس كافيه» ولا «كابتشينو»

خُدودُه عرْفوا جَمال النومة ع الأسفلت

والموت عارفهم قوى.. وهمّ عارفينه!!

■ ■ ■

لا الظلم هيّن يا ناس.. ولا الشباب قاصر

مهما حاصرتوا الميدان.. عمره ما يتحاصر.

فكرتنى يا الميدان بزمان وسحر زمان

فكرتنى بأغلى أيام.. فى زمن ناصر!!

■ ■ ■

شايل حياتك على كفك.. صغير السن

ليل بعد يوم المعاناة.. وانت مش بتئن

حمل المحامِل.. وإنت غضّ.. با تعجب

إمتى عرفت النضال؟ إسمح لى حاجة تجن!!

■ ■ ■

أتاريك جميل يا وطن مازلت.. وحتبقى

زال الضباب.. وانفجرت بأعلى صوت: «لأه»

حرّضتنا نبتسم.. ودفعت إنت الحساب

وبنْبتسم.. بس بسمة طالعة بمشقة!!

■ ■ ■

فينك يا صبح الكرامة الا البشر هانوا

وأهل مصر الأصيلة.. اتخانوا واتهانوا

بنشترى العزة تانى.. والتمن غالى

فتح الوطن للجميع.. قلبه وأحضانه!!

■ ■ ■

الثورة فيض الأمل.. وغنوة الثوار

الليل إذا خانه لونه.. يتقلب لنهار

ضج الضجيج بالندا.. إصحى يا فجر الناس

فينك يا صوت الغلابة.. وضحكة الأنفار؟!

■ ■ ■

وإحنا وراهم أساتذة خايبة.. تتعلم

إزاى نحب الوطن.. وإمتى نتكلم

طال الصّدا قلبنا.. ويئسنا من فتحُه

قلب الوطن قبلكم.. كان خاوى ومضلم!!

■ ■ ■

أوّلنا فى الجوْلة.. لسه جولة.. ورا جولة

ده سوس بينخر يا بويا فى جسد دولة

أيوه الملك صار كتابة.. إنما أبداً

لو غَفِّلت عيننا لحظة.. حيقلبوا العُملة.

■ ■ ■

لكنّ خوفى مازال جوه الفؤاد.. يكبش

خوفى اللى ساكن شقوق القلب ومعشش

يقوللى مش راح يسيبوا، ولسه حيقِبُّوا

وحيلاقولهم سِكك.. وبيبان ماتتردش!!

■ ■ ■

وحاسبوا قوى م الديابة اللى فى وسطيكم

وإلا تبقى الخيانة.. منّكم.. فيكم

الضحكة ع البُق.. بس الرك ع النِّيات

فيهم عدوين أشد من اللى حواليكم!!

انا المصرى - عبد الرحمن الابنودى

انا المصرى .. عبد الرحمن الابنودى
****
انا المصرى....كريم العنصر
سليل المخلصين ... المؤمنين
وحامى الامه فى وقت الشدايد
وشقاق السكك للواردين
ودمى ملك ليكم اجمعين
انا المصرى كريم العنصرين
***
انا المصرى كريم العنصرين
فقدت العقل والصوت والايدين وبعد ما كنت نجده وروح ووقفه
مانيش عارف نسيت دا كله فين
مين اللى سلبنى اسمى مين؟؟
انا المصرى كريم العنصرين
***
وكنت اصرخ اطفى النار بصوتى
ويحيى امتى فى الشده ..... موتى
فمين اللى كتب عارى ف جبينى
ومين اللى سرق شعله سكوتى
وانا اللى غنايا صحى العالمين
انا المصرى كريم العنصرين
***
انا متباع ...ماهيش عادتك يا وطنى
عدو..لعدو .. مين ماقبض شتمنى
صبى البقال يتاجر فى الضماير
واحلا عمرى ضاع مستنى زمنى
بقينا بصمتنا الموت متكتفين
انا المصرى كريم العنصرين
كان الوحل .. شد الرجل منى
انوح ابكى وانا قاصد اغنى
وواقفين ع الشطوط بايادى سودا
محال هيغرقونى غصب عنى
ولو نصبوا فى قلبى ميت كمين
انا المصرى كريم العنصرين
***
من الهرم للسد .. يدى
بنتها كلها ف لحظه تحدى
وكنت زعيم نبيل ما بين جفارا وتيتو وكاسترو ونهرو وغاندى
ومش محتاج اقول انا كنت مين؟؟
انا المصرى كريم العنصرين
***
وكان يخطب تصيب الدنيا ربكه
ومن لبنان يعود اسطول اميركا
ولينا فى الوجود كلمه ومكانه
واخوة فى الامل ....دمعه وضحكه
ورقابينا الابيه...مرفوعين
انا المصرى كريم العنصرين
***
وجونا اللى رمونا...للمهالك
تقول" لاه: يقولولها وانتى مالك ؟؟
تقول لبنان..احبابنا الاعزه
يقولوا يغوروا ...وتغوروا كذلك
نسيت من همى ابقى ازاى حزين
انا المصرى كريم العنصرين
***
وبعنا كل شىء ينباع ...بدقه
بشفافيه ومن غير اى سرقه
ونظرنا لعلم النهب صرنا
بننهب كل شىء .. لكن برقه
بقينا دكاتره وسط النشالين
انا المصرى كريم العنصرين
***
زمان كان فيه ملك فاحت روايحه
وثوار جيش بروحهم يومها .. ضحوا
وكان لينا شاءن حتى فى الهزيمه
وطن..كان يعجبك جمعه وطرحه
علينا عين .. واقى الامه عين
انا المصرى كريم العنصرين
***
وعاد تانى الملك يحكم بلاده..
ومن بعد السنين دى .. زاد فساده
وكنا ساده فوق ارض الكنانه
واصبحنا عبيده .... او عباده
وضاع فى الزحمه مشوار السنين
انا المصرى كريم العنصرين
***
وتانى يا فقير عاد من يخونك
وتتهان فى بلادك عينى عينك
ولا الدين مكتفى من مص دمك
ولا عارف ديونهم من ديونك
وجيت للحق؟؟... كله سلف ودين
انا المصرى كريم العنصرين
***
وده يسلم لده والعصر فاجر
وتاجر حنت..سلمنا لتاجر
وام الامه مصر الانسانيه
بتتامر .. وبتدارى الخناجر
وكنت النجده واستنجد بمين
انا المصرى كريم العنصرين
***
وكنت اصرخ .. وكان الكل يسمع
وامد الايد .. عدو الامه يرجع
وجانى النطع يامرنى ويشخط
وخلانى بقيت فى الحق انطع
انا الى كنت اصحى الغفلانين
انا المصرى كريم العنصرين
***
وكانوا يقولو "مصر" الشمس تطلع
وتعلا رقابنا فوق .. وعيوننا تلمع
وكنا نشيل قلوبنا فوق كفوفنا
ويصدرونا نواجه اى مدفع
فمين ساعدنا ع الوضع المهين..؟
انا المصرى كريم العنصرين
***
وازاى النهارده الدم .. عومى
مقلقل صحوتى وساكن فى نومى
دمانا بتشتعل فى ارض غزه
ولبنان نارها ماسكه فى هدومى
وانا اللى فى الاسى واقف ما بين
انا المصرى كريم العنصرين
***
ولولا الانظمه العريبه لامت
وفى صفوف العدو حتكون وكانت
ما كان الموت عرف "صيدا" و"بعبدا"
ولاكانت قيامه الغدر قامت
ولا قلب العرب بيت حزين
انا المصرى كريم العنصرين
***
وشوف لبنان بترحل من جنوبها
ونوم الليل .. ما بيعرف جنوبها
سطور النمل زاحفه للملاجىء
وريح الخونه ما هدت هبوبها
راحلين فى قلبى مذعورين
انا المصرى كريم العنصرين
***
فيا لبنان انا .. م اللى خانوك
يا حزب الله حكامنا باعوك
يا صاحبى .. ماعدنا نملك غير هتافنا
هتافنا .. مر مالى رقابنا شوك
وعلنى .. بنفس الفعل المشين
انا المصرى كريم العنصرين
***
يا نصر الله ده .. زمن البياعين
وانت طلعت الامه منين؟؟
تفكرنا بكل اللى نسيناه
اظنه صعب يصحوا الميتين
وخليتنا الجميع متفرجين
انا المصرى كريم العنصرين
***
مازال العدو نفس الخبيث
ابونا مات وسابهو ه لنا وريث
ومهما يلف ويدور .. راح يغور
واسال عندنا بيوت السويس
انا المصرى كريم العنصرين
***
بقت رايتك خلاص رمز لجهادك
بقت رمزالمقاومه فى بلادك
ولبنان كلها بايته فى ضميرك
خلاص صبح الجهاد ماءك وزادك
لغير المسلمين والمسلمين
انا المصرى ... كريم العنصرين
***
بلاد الا مريكان احنا وصهاينه
وصمتى ع اللى حاصل ... كله معنى
مازال الحلم لم فارق دمايا
على رغم اللى عاشه طعنه .. طعنه
يا لبنان الكرامه ....لا تلين
انا المصرى كريم العنصرين
***
ويا لبنان ما تطفيش نار نضالك
رجالك .. حتى لو ماحناش رجالك
بحور الدم ماتغرق حقوقك
ولا تكسر مجاديف احتمالك
حبيبك .. بس مش قادر اعين
انا المصرى كريم العنصرين

بغداد - الابنودى

بغداد - عبد الرحمن الابنودى

*****

مهما أقول أو تقول॥ إيه راح يفيد الكلام؟..

حكامنا صاحبوا العدو.. وإحنا رحنا ننام

قالو لنا: »حنحلها إحنا في خمس تيام

آدي بداية انهيار الأمة قدامنا

بعنا حقيقتنا وسكنّا في أوهامنا

عشنا وزادنا الخطب.. كرهتنا أحلامنا

أنا ما بنيت الدار إلاَّ لاحارب

ودار بلا حربٍ... عليا حرام!!..

......

مهما أقول أو تقول.. إيه راح يفيد الكلام؟

مش قالوا حنحلها إحنا في خمس تيام؟..



آدي العراق منطرح ع المقصلة.. بناسُه..

مستني حكم الغريب الجاي... بمداسه

يدوس علي الأمة.. وتسممنا أنفاسه

واحنا بنسأل: »صحيح فيه حرب يا اخواننا«؟...

وقال صحيح.. طامعة أمريكا في بترولنا؟؟..

مش هيه كانت صديقتنا.. كما فهمنا؟..

يا أمة.. جزم العدو.. دايسة علي رقابنا

وازاي بنسعد قوي.. في كل ما داسوا؟..

......

وآدي العراق منطرح ع المقصلة بناسُه

وكأننا إحنا.. ولا أهله..... ولا ناسه!!..



بيننَّا ما بين الدمار.. الدُّوس علي الأزرار

وتبتدي الكاِرثَة وتصعْد جبال النار

أمريكا.. في كل ساعة.. تبدّل الأعذار

والأمة قاعدة بتتفرج وتتشكك...

تشوف صورها علي الشاشات تقوم تضحك

وتسألك.. تفقعك.. وتقول: »صحيح فيه ضرب«؟..

من كتر ما نعسنا في الضلة.. نسينا الحرب

نقفلها م الشرق يفتحها علينا الغرب

عدو.. ما بينامش لا في الليل.. ولا في

نهار!!..
......

بينّا ما بينه.. يا دوب دوسه علي الأزرار

وتبتدي الكارثة وتشعلل جبال النار!!..



أمريكا يمّ العراق زاحفة بلا قوانين

زي إسرائيل اللي قاتلة ولادنا في فلسطين

لاتنين علي نية.. ريحة الدم.. هيه الدين

جايين.. معاهم سلاح يقتل بلا تنشين

واحنا اللي إيدنا بلا حِتة عصايةْ توت

واللي أخدنا خلاص علي ابتسامة الموت

متلطشين م اللي مش فايت وم اللي يفوت

وسلاحنا طوب.. إنما.. إحنا اللي متَّهمين!!

......

وامريكا يم العراق زاحفة بلا قوانين

زي إسرائيل اللي قاتلة الشعب في فلسطين!!



قال إحنا لؤما قوي وقال ايه نتحايل

وقال بنخفي السلاح.. في الضل لو مايل

في لقمة الطفل أو في مشية الحامل

سلاح رهيب.. مستخبي فيه دمار شامل

يا ريت يا سيدي ما كانش الحال بقي مايل

ولا كنا نتسول التأييد من الغربا

والجرح يوسع يوماتي لاطب ولا طببا

وأقلها كلب.. يشتمنا.. ويتطاول!!

......

قال إحنا لؤما قوي ع الحيلة نتحايل

وقال بنخفي السلاح في الضل لو مايل



وإحنا ضعفا... بنصرخ.. زي طفل غريق

قوِّتنا ضاعت ما بين الكرْه والتفريق

وكل دولة تلاتة متر.. عاملة فريق

قال ده أخويا اللي لعدوي.. أعز صديق

يحب وش العدو.. وش العرب لأه

ياكل طعام العدو.. لقمة اخوه.. لأه

يلبس قماش العدو.. وقطن أخوه لأه

تقوله: »أهلاً«.. يروح يشكيك لأعداءك

قول رأيك ايه لما تصبح أمتك.. داءك؟

تفطر بكاس العداوة كل يوم ع الريق!؟

......

وإحنا ضعنا.. بنصرخ زي طفل غريق

وكل دولة تلاتة متر.. عاملة فريق!!

السَّكرة راحت أهه.. وطلّت الفكرة

وكنا خايفين مجيئ بكرة.. وجه بكرة..

بدأوا بأرض الديانة: »القدس« و»الناصرة«

»بيت لحم« و»جنين« و»نابلس«. واسألوا »غزة«

أعز أولاد.. لأمة متاجرة في العزة

الركلة آخر مزاج.. والصفع له لذة

كل العذاب ده ولا عرفناش يا ناس نكره؟..

......

وكنا خايفين مجيئ بكرة وجه بكره

والسكرة راحت أهه وفضلت الفكرة



إشمعني يعني العراق ولافيش غير هوه

علشان تغير نظامه إنت بالقوة..؟

الأنظمة كلها.. ما بتختلفش يا أخ

مَد المواطن قفاه ومنعتوا آه أو أخْ

مش أنظمة.. في الحقيقة دي مجرد فخ

لو المواطن جمل بحملكم كان نخ

وكل حاكم لئيم.. براه.. غير جوه

......

واشمعني يعني العراق؟.. ولافيش غير هوه

علشان تغير نظامه إنت بالقوة؟..
قلنا زمان.. اعتدَي علي الكويت ظلماً

وكنا ضده... وقررنا يعود حتماً..

دلوقت لا راح علي أيسر ولا أيمن

حكايتكو يا الأمريكان ألغز من الألغاز

وف تبريراتكو المريبة باشم ريحة الجاز

الكدب علي وشكم.. ما ينقصوش برواز

شعب العراق لن يموت.. الموت لكم إنتم

إنتو اللي جرتوا عليه.. وانتو اللي أجرمتم

ولا راح نفوت تارنا مهما رجعتوا وبعدتم

يا دي الرئيس اللي علي قول الضلال.. أدمن



مطلوق علينا.. كأنك ديب جعان شارد

وجاي علينا.. بتتمطع قوي... وفارد

في »كوريا« نعجة وعلينا جاي عامل مارد

لا إنت عمي.. ولا أمي.. ولا الوالد

علشان تيجي لبلادي بكل أسلحتك

تنقذني م اللي حاكمني... كنت عينتك؟..

عارفك ما تعرف يا قاتل.. إلا مصلحتك؟

مش أنظمة!!. إنما.. قابلينها يا بارد!!

......

مطلوق علينا كأنك ديب رهيب شارد

في »كوريا« نعجة.. وعلينا.. جاي عامل مارد!!



أطفالنا ماتوا.. ولا سائلش عنهم حد

تحت البيوت قبل حتي ما البيوت تنهد

ونسألك إنت.. وكإنك نسيت الرد

الدنيا تطلع مظاهرات والهتاف بيقول

واللي في مخك في مخك.. لا يهمك قول

قلبك علي إسرائيل وعينيك علي البترول

واخدينها إحنا هزار.. وانت واخدها جد!!

......

أطفالنا ماتوا ولا سائلش عنهم حد

والدنيا تسأل.. وكأنك نسيت الرد



آدي العراق القريب م القلب راح منا

بعيد بعيد.. ابتعاد النار عن الجنة

واحنا زي النُّظُم.. خطبة.. وقفِّلنا

ونرجعوا للبيوت تاني بنتمنظر....

الطيارات بالدانات والشاشة بالمنظر..

وإحنا لا حوله ولا يعذرنا من أنذر

ولا في عرق اتنفض فينا ولا أَنَّه

......

آدي العراق القريب م القلب راح منا

بعيد بعيد.. ابتعاد النار عن الجنة



خلاص نسينا النضال.. اليوم نقول بغداد

وبكره حنقول كذا.. وبعده ياما بلاد

واحنا كما المربوطين.. في أوتد الأوتاد

الشهدا بيموتوا يومياً قصاد العين...

من تحت عينيك عيون شايفانا يا فلسطين

أميرة إنتي ما بتلوميناش.. تلومي مين؟

ما ظنش اللي شبهنا تجوز لهم رحمة

إذا بدم البلاد... بيلونوا الأعياد!!

......

خلاص نسينا النضال.. اليوم نقول بغداد

وبكره حنقول كذا.. وبعده ياما بلاد!!



يا أمة قومي بقي.. ده انتي فضحتينا...

الأمريكان سكنوا مش وسطينا.. لأفينا

والاّ اليهود اللي سرقوا حتي أغانينا

حرتوا الأراضي وقتلوا هناك أعز الولد

الشهدا أكوام علي الأكتاف.. إوعي تعد

أبدان جميلة.. بتاكلها النسور والحِدّ

إحنا انتهينا... تعالوا ياللي بعدينا!!

......

يا أمة قومي بقي لأحسن فضحتينا....

الأمريكان سكنوا مش وسطينا.. لأفينا!!

ياللي في عُسري وضيق اليد نسيتونا

أهي الفلوس نفسها.. حاتروح لأعادينا

بترول أراضي العدو ده اللي في أراضينا.!!

شفتوش كده؟ والبلاد ممنوع نحميها

نحميها من مين؟ دي مش أراضينا.. أراضيها

هوه بسلاحه المميت.. جاي ينزرع فيها

وانتو.. بدخان صمتكم يا أهلي عميتونا

......

ياللي في عسري وضيق اليد نسيتونا

أهو جه ياكلكوا اللي علي حربه انتو لُمْتونا!!

يا أمة ترمي ضميرها للكلاب.. ببلاش

يا أمة قبلت مصيرها (خدمة الأوباش)

كله كلام.. لا انتماء.. ولا وطن.. ولا دين

قاعدين سنين تحلموا بظهور (صلاح الدين)

ماكان ما بينكم قتلتوه انتو يا فالحين

كل اللي صدوا العدو.. راحوا ومش راجعين

ولا »صلاح دين« يا ناس ولا حتي زفت الطين

الحي ميت يا ناس أما اللي ميت عاش

......

يا أمة ترمي ضميرها للكلاب ببلاش

يا أمة قبلت بفرحة.. خدمة الأوباش

ما اعادش إلا انتظار الموت.. يا إما نقوم

نسجد في ساحة النضال وعن البلاهة نصوم

لو الدما تبقي بحر.. في دمنا.. حنعوم

إزاي يعيش الوطن.. من غير رجال تحميه؟

تموت وتحيا معاه.. تموت وتحيا ليه..

كإن ابن العرب مولود يا ناس.. مهزوم

......

ماعادش إلا انتظار الموت يا إما نقوم

نحمي الوطن بالصدور.. ونفجر المكتوم

كل الشوارع بتصرخ في المدن بجنون

توقّف الحرب.. تفضح فكرة المجنون

في أوروبا حتي ف أميركا.. لأ في كل الكون..

إلا احنا إرتحنا قدام أي تليفزيون

آدي العراق في طريقها للغرق يابا

واحنا حواليه خُطبنا فجة... كدابة

نتخانقوا من غير سبب.. لأ فيه سبب طبعاً

وحنغرقوا في الزمن.. يا أمتي.... جمعاً

متملعنين... إنما... عدونا..... ألعن

قدَّامُه حملان.. لكين.. علي بعضنا ديابة!!

الكل عايز ساعات المؤتمر تمضي..

علشان ما يجري علي دار العدو.. يمضي

كإن بعضي ينازعني.. علي بعضي..

معظمنا هوه العدو.. يعني العراق يا هوه

مش أمريكان وانجليز.. إحنا اللي حنهدوه

واحنا اللي بتروله رايحين للعدو نِهْدوه

وبعده بترول جديد.. وبعده بترول جديد

وأنا منتظر مقتلي وإيدي علي خدي!!

......

الكل عاوز ساعات المؤتمر تمضي..

علشان ما يجري علي دار العد (يمضي)!!

أنا باهيب بالشباب.. إنسوا اللي قضُّوا العمر

يتكلموا ويخطبوا وسابوا سنينكو... تمُر...

ده انتو القلوب الفتية والوجوه السمر

ترضوا تبيعوا الوطن بتفاهة الغايات؟

وتبقوا إنتو وأعداء الوطن إخوات؟

متربصة بيكو أم العولمة والجات

تتمِسْحوا م الكون كما مسحوا الهنود الحمر

......

أنا باهيب بالشباب انسوا اللي قضّوا العمر

يتكلموا ويخطبوا وسابوا سنينكو تمر

يا أمة قومي.. وانتي يا مصر.. ماتونِّيش

وإلا عشرين سنة.. حاتمر زي مافيش

تعلا اليفط أعلا ميادين أمة الإسلام

شركة إسرائيلية اهه لصناعة الأقلام

واستديو صهيون هنا لصناعة الأفلام

والمصنع الإسرائيلي لعلبة الورنيش

......

يا أمة قومي وإنتي يا مصر ماتونيش



بغداد.. يا أم التاريخ والحكمة والأشعار

بغداد يا أم القصور والنخل والأنهار

ماعادش إلا الصمود الليل في آخره نهار

دافعي بشرف واتركي للأمة طعم العار

ملو التاريخ.. الفصول صادقة وكدابة

سنتين تقدَّم.. وألف.. نعودوا للغابة

الأمة فيها فرح لأزمله ندابه

الدنيا كلتها تهتف باسمِك المظلوم

بكره الجراح تندمل.. عُمر الظلام مايدوم

أطفالك اللي التاريخ حيحكي قصتهم

ونساكي في صبرهم. الدنيا نسيتهم

يا دي العراق العريق صحّي العرب م النوم

يا طاعم المحرومين.. إزاي تبات محروم.؟

ومهما كانوا الطغاة.. الدار لأهل الدار

الدار لأهل الدار

الدار لأهل الدار

قصيدة " والد الأراجوز "

قصيدة " والد الأراجوز "

*****

انا والدى كان أراجوز..

وكان راخر جميل الصوت ..

والزعبوط..

وفى يوم من الأيام ..

خللى بالك معايا ..

هنا العقده .

ندهه الملك ..

وده كان ملك أعظم من العمده ..

وعينه .. مضحك ولى العهده ..

وقاله يا ألعب من القرموط ..

تضحك الولد .. أعلى مراتبك ..

تبكى الولد .. أقطع رقبتك ..

أفهم كلامى .. وأمشي بالمظبوط ..

أنا والدى الله يمسيه بالخير ..ماكنش ناقصه .

طلع سلاح أبيضانى .. وقطع رقبته بنفسه ..

راح الولد فى البكا .وأنا والدى مات مبسوط .

أنا والدى مات مبسوط عشان عكس امر املك ..

أيام ما كان الملك .. ملك ..

ومصروف الأمل مضغوط .

من يومها وأنا عندى جيوب انفيه ..

وعيونى كما الحنفيه .

والدمع منى و فيه .

بحر ماله شطوط ..

*****

فؤاد حداد

قصيدة / حبيب قلبى

.. حبيب قلبى ..

 

حبيب قلبى..

وانا تايه فى دنيا غريبة و معافرة ..

لقيت حرفك .

مراكبى ف شط احلامى ..

كلام مخفى .. لميت فكرة ..

يهز كيانى من جوا .. وله شيفرة..

تحل الحزن جوايا.. تاخدنى ف حلم ويايا..

اشوف حلمك .. وأتمنى ..

ومين غيرك بمجدافه يسوق حلمى ..

لبر الحرف و المعنى .

 

حبيب قلبى .

وانا تايه لقيت حرفك .

مراكبى لشط عنوانى .

ندانى ف سرى و اتهجى .

بتعويذه .. وكام آيه .

ترج كيانى .. ميت رجه .

لقيتنى بنام على صوتك .

ومن قولك .. يقول قلبى .

واقرا وِرْد ايامى .

ف كون حبك .. يدوب حبى .

 

حبيب قلبى .

وانا جنبك مفكرتش .

ده امتى .. او ده ليه و ازاى ..

لانى عارف ان انت .

عاشقها زيي من قلبك .. بنغمة ناى ..

وبلمح بين رموش عينك .

دموعها وهى بتنادى .

ببحر حنانها .. بتناجى .

تعالى .. مشتاقه لعنيك . لبر امان ..

تعالى .. خد ايدى ف ايديك ..

وعدينى.. لشط امان .

 

حبيب قلبى .

شامم ريحة طيابتها .. مابين حرفك ..

بتسكن هدمتك .. وتوفح .

بتنعشنى .. وتوحشنى .

اضم عطورها بين حرفك .. منين ماتروح ..

واحضنها .. وادوب من تانى جواها .. ف نينى العين .

يابختك بيها يا صاحبي .

عايش فيها .. قريب منها . ف ارض حنين ..

وحرفك يشبهك ف كتير .

ملامحة حته من وشك .

سماره جوهرة من النيل .

وقلبه لؤلؤة من البحر .

تنورلى ف عز الليل .

وعنيه دافيه .. ورقيقة .

كقلب الام .

وقلبه طيب المعنى .

و كفه .

بلسمي من القهر .

 

حبيب قلبى .

دى وحشانى ..

ونورها مطرحه ف القلب .

وانا ذنبى .. بدوب فيها .

واعيش بالحرف معنى الحب .

امانة عليك .

تسلملى على خدودها .

تبوسلى كفوفها من قلبك .

تبلغها هناك و بعيد .

اكيد واحد عاشق حضنك .

ودايب قد ايه ف الحب .

وشايلك جوا وجدانه .. حياة القلب..

حبيب قلبى .. وايامى .

واحشنى وهى وحشانى .

ويوم مارجع .. هاوريلك .

صورتها ونقش ملامحها .

طبعته ف نينى احلامى .

 

حبيب قلبى .

 

طارق المملوك

22-3-2007

 

قصيدة / وش القمر

.. وش القمر ..

 

وش القمر .. طالل حزين ..

طفى شموع نور الضيا .. ع المحتاجين .

على مصرنا .

على ارض كانت طيبة .

مرت سنين..

صبحت وشوش كل الوطن ..

طافية و عابسه .. مكشرة ..

ساد الضلام ف وشوش جميلة مأصلة .

سكن الملامح .. والشفايف و العيون .

ساد الضلام .

والعتمة صارت مننا .

جوا البيوت .

بين الحوارى و الشوارع .. و الشطوط .

واتارى نور ارض الوطن ..

كان اصله نابت مننا ..

من ضحكنا .. من حرفنا ..

داير مابينا ف حينا ..

يضحكلنا .

ينور لنا .

عتمة عبوسنا .. و قهرنا ..

بنكته دايره ف ارضنا .. فوق الشفايف تترسم .

وبتبتسم .

نسمعها ضحكة منورة . فوق الوشوش .

نلمحها نور شمس النهار ..

على نهرنا .

على شط وادي مننا .. مليان خضار .

على مايه سارحة ف الغيطان ..

تروى بحياتها زرعنا ..

وتصير شموس .. و تصير ضيا ..

و تصير مابينا ضحكة راسية ف وشنا .

و تصير نهار .

قوم يتملى رمل الصحارى .. بالكنوز .

ويا النعم .. ويصير عمار ..

من ضحكنا .. يدور المكن ..

ويكون لنا هو السند ..

ورث البنات .. ورث  الولد ..

 

*****

 

ده المصرى عاشق ضحكته ..

عاشق الحياه .

عاشق العمار .

عاشق تراب ارض الوطن لون الخضار .

حتى الشهيد لو شوفت قبره تلمحه ..

ساعة ما مات لجل الوطن ..

حاضن سلاحه و ضحكته ..

وعيونه على بكرة اللى جاى .. متاكده .

وعشان كده .

وش القمر .

عاشق الولاد .

لما تشوفه بطلعته .

برطم .. رطن .

خبًا ضياه بين الصخور .. مات و انقهر .

لما انطفى وش الولاد ..

مستنى يوم يجيى المعاد ..

بينا و بينه .. و طلته ..

ترجع وشوشنا تبتسم .

ترجع حياتنا تترسم .

يحيا الوطن .

 

طارق المملوك

10-3-2007

 

قصيدة / العذراء و القوس ..

العذراء.. و القوس..

يا برج عالى ف السما فوق .
عذراء ورامى جوا قلبى ..
سهم شوق ..
مغرم صبابا والنبى ..
غلبان انا ..
واقف بنادي نجمتى ..
تميل على برج الحمام ..
يسكن يعشش قلبها ..
يسكن تيجان الحب فوق شعرها .
سلسال حرير .. لما تميل ..
يسكن غناوى قدها ..
مين قدها ..
طير يا حمام.. بلغ سلام ..
اصل الحبيبة برجها .. زيك تمام..
عذراء خجولة وطيبة .. وحنينة ..
قصر الكلام ..
برج إنما ايه مشكلة ..
عاشق السكات ..
وصبور بشكل لا يحتمل ..
حاسس بإنى شفتها قبل الزمن .
قبل اللغات .. قبل الكلام .
قبل ماعرف لى وطن ..
وده شئ اكيد مش محتمل ..
ولجل ذلك بعتقد عندى أمل ..
رفرف يا طير وزقزق زقزقة ..
دى عروسة حلوة ف برجها ..
عذراء جميلة . .مزوقة ..
عذراء .. وطار عقل اللى شاف ..
عذراء ويخجل منها .. توب العفاف ..
قلبى اللى طاف .. ياما وشاف ..
كل البنات .. وقف مكانه و اندهش ..
طلب الجوار يا مغرمين ..
حد الرموش من غمد عين ..
لالى ف نور المغربية .. وانتعش ..
رفرف يا طير .. قلبى انكمش ..
مع انه قوس .. من ضهر قوس ..
لكنه داس كل الطقوس ..
راح عندها .. سلملها ..
كل اللى حيلته من سهام ..
اصبح يا عينى عندها .. من دون كلام ..
مغرم اسير ..
وده مش كتير .. على حسنها ..

طارق المملوك

2006-4-27